Ұлытау облысында туберкулезді ерте анықтау, алдын алу және емдеу мәселелері бойынша оқыту семинары өтті

2026 жылғы 8–9 қазанда Ұлытау облыстық фтизиопульмонология орталығының ұйымдастыруымен өңірдегі алғашқы медициналық-санитариялық көмек (МСАК) ұйымдарының дәрігерлеріне арналған оқыту семинары өтті.

Іс-шараға Ұлттық фтизиопульмонология ғылыми орталығының (ҰФҒО) және Жаһандық қордың мамандары — Рашитов Махмуджан Разикулович, Смагулова Ризвангул Сатаевна және Тусупбекова Гаухар Толеужановна қатысты.

Семинардың негізгі мақсаты — медицина қызметкерлерінің туберкулезді ерте анықтау, алдын алу және емдеу мәселелері бойынша кәсіби құзыреттілігін арттыру, сондай-ақ алғашқы медициналық-санитариялық көмек деңгейінде ауруды уақтылы анықтау дағдыларын жетілдіру.

Оқыту барысында туберкулезге күдікті пациенттерді анықтау, диагностикалық тексерулерді ұйымдастыру, профилактикалық іс-шараларды жүргізу және пациенттерді мамандандырылған медициналық ұйымдарға уақтылы жолдау мәселелері қарастырылды.

МСАК дәрігерлерінің туберкулезге қатысты клиникалық қырағылығын арттыруға, сондай-ақ алғашқы медициналық-санитариялық көмек ұйымдары мен мамандандырылған фтизиатриялық қызмет арасындағы өзара іс-қимылды нығайтуға ерекше назар аударылды.

Мұндай оқыту іс-шараларын өткізу медициналық көмектің сапасын арттыруға, медицина қызметкерлерінің кәсіби дағдыларын жетілдіруге және өңірде туберкулездің алдын алу мен оны ерте анықтау жүйесін нығайтуға ықпал етеді.