Алматыда өкпе туберкулезін емдеудегі робот-ассистенттік хирургия бойынша халықаралық шеберлік сабағы өтеді

2026 жылғы 13 қазанда Қазақстан Республикасы Денсаулық сақтау министрлігінің Ұлттық фтизиопульмонология ғылыми орталығында «Өкпе туберкулезіндегі робот-ассистенттік хирургия: заманауи технологиялар мен хирургиялық тәсілдер» тақырыбында халықаралық шеберлік сабағы өтеді.

Іс-шараға қазақстандық және шетелдік мамандар қатысып, робот-ассистенттік торакалдық хирургияның заманауи мүмкіндіктерін, озық хирургиялық технологияларды және өкпе ауруларын емдеудің жаңа тәсілдерін талқылайды.

Шеберлік сабағының басты оқиғасы — тікелей эфирде көрсетілетін өкпеге жасалатын екі робот-ассистенттік операция. Операциялар конференц-залға тікелей трансляцияланады.

Операцияларды Қытай Халық Республикасындағы Харбин медициналық университеті жанындағы онкологиялық аурухананың торакалдық хирургия бөлімінің меңгерушісі, профессор Сюй Шидун (Xu Shidong) торакалдық хирург Фэнхай Жэньнің (Fenghai Ren), MD, PhD қатысуымен жүргізеді.

Бағдарлама аясында хирургиялық консилиум өткізу, жасалған операцияларды талқылау және сұрақ-жауап сессиясын ұйымдастыру көзделген.

Шеберлік сабағы халықаралық кәсіби тәжірибе алмасуға, заманауи хирургиялық технологияларды талқылауға және торакалдық хирургия саласындағы мамандардың практикалық білімін жетілдіруге мүмкіндік береді.

📍 Өтетін орны: Алматы қаласы, Ботакөз көшесі, 1/1, ҚР ДСМ Ұлттық фтизиопульмонология ғылыми орталығы.

📅 Күні: 2026 жылғы 13 қазан.

⏰ Басталуы: сағат 08:00-де.